古代Uber - 人力車血淚史
香港交通掌管香港人嘅生活脈搏兼同經濟息息相關. 貓館長會喺未來幾個展覧以呢個議題由早期嘅人力車講到現代嘅地鐵, 逐一剖析呢啲香港交通工具鮮為人知嘅歷史故事.
人力車起初係由日本人發明, 1874年引入香港, 因為只需要一個人操作, 靈活性高, 所以好快就成為當時嘅主要交通工具, 同時亦都為勞動人口提供就業機會。一開始引入嘅時候並無任何特別管制, 所以好多時出現人車爭路同爭客動粗嘅情況引致交通混亂. 直到1883年3月24日, 當時嘅港英政府通過《車輛及公共交通法例》（The Vehicles and Public Traffic Ordinance）嘗試去制定一啲交通規則同發牌條件去改善呢啲情況. 呢啲規定包括：
- 牌照按金50元；(而當時人力車司機每個月嘅收入係$5至$13)
- 牌費每半年3元，車夫牌照2角；牌照不可轉讓；(後來喺1887年加到每半年6蚊, 牌照升到3角)
- 警務處長有權因車或車夫衣著不潔淨而拒絶發牌；
- 車資跟警務署長指示收取；
人力車車夫生活艱苦, 好多時兩個人早晚分租同一張床. 又因為語言不通, 要靠佢哋嘅車主提供保護同對外嘅資訊. 以上嘅機制被視為針對同壓榨一啲無話語權嘅車主同車夫, 加上當時外籍客人嘅歧視問題嚴重, 毆打同侮辱車夫嘅事件都經常發生, 而當時嘅警察都偏向維護外籍乘客, 往往被處罰嘅最後都係呢一啲車夫. 所以喺無代表權同話語權下被港英政府制定嘅法列, 成個人力車行業都覺得係官官相衞, 因此佢哋並無意欲去跟從. 就係因為咁, 來自五湖四海嘅人力車司機開始組織自己嘅工會, 為自己爭取權益同生活保障, 當中極富傳奇色彩嘅包括:
香港顏氏宗親總會 (顏氏家族係人力車業務嘅龍頭, 創辦人顏永祠個仔顏成坤就係中華汽車有限公司嘅創辦人, 擁有最早期香港島巴士專營權嘅中巴）
義安工商總會(無錯, 佢就係新義安嘅前身. 原來黑社會是這樣煉成的）
最後呢啲工會發動或參與咗後來大大小小嘅罷工抗議, 包括1922年嘅海員大罷工同埋1925年嘅省港澳大罷工呢啲對香港歷史有舉足輕重意義嘅抗爭.
雖然香港最後一位人力車夫洪先生喺上年2021年都已經結束營業, 但係佢嘅歷史意義源遠流長, 今次貓館長以呢個做主題, 希望大家可以透過AR體驗下呢架人力車背後嘅故事, 同思考吓呢啲故事對我哋現今帶來嘅影響.
依家就㩒呢個link將呢架人力車放大縮細帶入你屋企:
資料來源：
https://borderless-hk.com/2018/02/20/香港人力車夫的故事/
https://www.amazon.com/Reluctant-Heroes.../dp/9622097340
https://zh.m.wikipedia.org/zh-hant/顏成坤
特別鳴謝3D Modeler參與製作, 希望之後多啲合作將更多更好嘅AR體驗帶比大家，follow埋佢：https://www.facebook.com/我要做Model-完宇宙空間設計-112901323414921/
--------------------------------
