先施以誠百貨之父
窮L馬應彪點樣打破宿命，自學一生白手興家創立第一間華資百貨公司，以商救國之餘，肩負起社會責任教育訓練香港人營商之道?
1881 年, 只得17歲嘅馬應彪, 並無因為出身窮困而志短, 毅然拎著佢老豆比佢嘅少少水腳去咗澳洲嘅菜園打工. 去到之後, 又無因為唔識英文而hea過生活, 反而積極搵出路, 為咗學好英文, 幫當地嘅一個愛爾蘭家庭打工, 唔收錢, 只求食宿同學好英文. 好快咁, 佢學有所成就自立門戶, 開咗自己嘅菜檔. 因為打破咗語言障礙, 所以喺嗰邊無論鬼佬定係華人嘅生意都做到風生水起.
有咗第一桶金, 加上當時澳洲排華, 喺政治因素不穩定嘅情況下, 1894年馬應彪諗住將佢嘅生意業務轉去香港….就喺返香港嘅途中, 佢遇上改變佢一生嘅同鄕- 國父孫中山.
受孫中山啟發, 佢決定要加強華資企業嘅競爭力, 以商救國. 佢一返到香港第一件事就係集資開辦咗一間百貨公司叫先施百貨. 細細個聽到先施呢兩個字以為佢只係英文Sincere直譯嘅諧音. 點知原來呢個名係取自於《中庸》入邊嘅”先施以誠”, 喻意係為表真誠要先付出, 提醒佢自己要以真誠對待顧客.
就係因為咁, 先施公司做生意嘅方式非常均真, 打破當時華資商戶鍾意講價嘅傳統, 所有貨品都係明碼實價, 唔會話有同你熟啲就計你平啲呢種唔公平嘅情況出現. 佢另外一個反傳統嘅經營手法就係請女性做sales, 1900年代嘅香港係一個好封建嘅社會, 傳統覺得女人唔應該拋頭露面, 但係馬應彪就認為用女性擔任售貨員有助增加銷量. 事實上呢幾個革新嘅零售方式令當時社會嘩然之餘亦為先施帶嚟人流, 生意好到不得了. 不出10年, 先施公司嘅業務已經發展到去中國大陸不同嘅大城市.
當時嘅先施公司更有不同嘅娛樂設施例如電影院同照相館, 係當時嘅潮流指標, 濕平勝地～ 而馬應彪亦都發財立品, 並無忘記到當時開設先施係為咗以商救國嘅初心. 佢積極參與革命事務, 協助革命籌募處理資金, 仲係其中一個金主添. 佢雖然自己未讀過書, 但係好積極咁樣教育佢嘅員工, 設立好多培訓課程, 教育香港人英文同營商之道. 又捐錢比大學繼續作育英才,回饋社會. 雖然最後喺中國嘅生意因為政權易手而被沒收, 但係佢破舊立新嘅勇毅同熱愛社會嘅性格就遺傳咗喺第四個仔馬文輝身上, 而呢個仔最後仲成為左早過黃毓民嘅本土派始祖添～
貓館長今次就以呢間位於香港皇后大道中嘅第一代先施老舖為主題做咗呢個AR展覽, 帶大家Window 濕平, 體驗1900年嘅企業家精神同馬應彪以商報國嘅情懷. 希望大家記住呢一種培育香港發展嘅百年精神, 將佢延續落去～
㩒呢個LINK，將百幾年前嘅先施老店透過AR帶到你身處嘅任何地方
資料來源：
http://oceandeeop3000.blogspot.com/2018/06/blog-post.html
https://shelia85.medium.com/華資百貨業-一代神話落幕-先施百貨的百年之路-95ff460bee74
https://medium.com/recall-hk/f-f862b2ce73f5
港識多史｜香港歷史社會研究社
https://www.wetoasthk.com/《教科書不會教的36-個香港歷史人物》再版後記/
